Kua whai wāhi atu te pakipūmeka hākinakina reo Māori tuatahi o Aotearoa, a Ruamata: It’s More Than Hockey, ki runga o Araraurangi Aotearoa (Air New Zealand).
He mea whakairi te pakipūmeka ki te “inflight entertainment” a Araraurangi Aotearoa i te kainamutanga mai o Mahuru Māori me Te Wiki o Te Reo Māori hei te Hepetema.
He pakipūmeka mīharo a Ruamata: It’s More Than Hockey e rangona ai te ihi, te wehi, me te wana o te kapa haupoi tāne o Te Kura Kaupapa Māori o Ruamata.
Ka kitea i roto i te pakipūmeka roa nei, ngā aupiki me ngā auheke a te kapa o TKKM o Ruamata, i a rātou ka eke ki te whakataetae Rankin Cup 2023, arā, ko te whakataetae haupoi kura tuarua tiketike o Aotearoa. He tuatahitanga i ngā tau kotahi rau o te whakataetae.
DOCUMENTARY TRAILER:
Koia nei te pakipūmeka hākinakina reo Māori tuatahi kua whakapuakina i Aotearoa nei, me te aha, ka whakaritea ki te pakanga i waenga i a Rawiri rāua ko Koriaha. Arā, ko te punua kura kaupapa Māori e 32 noaiho ngā tama hei kōwhiringa ki te kapa, e tātāwhāinga atu ana ki ngā kura Pākehā whai rawa o te motu.
Hei tā te Kōmihana Māori o RNZ, hei tā Jana Te Nahu Owen i te whakarewanga o te Pakipūmeka i te Pepuere kua hipa, koinei te taumata o ngā pūrākau Māori e whai tūrangawaewae ai ki ngā ngākau o te motu whānui.
“Ruamata: It’s More Than Hockey makes stars of the rangatahi in a hockey team from a small kura kaupapa Māori in Rotorua that is led by a remarkable coach with the support of whānau and the whole hapori(Community). There are plenty of challenges and moments of success and it’s beautifully made. It’s a great example of content that normalises te reo Māori and its exactly what we are looking for with RNZ Māori commissioning.”
Me te hīkaka o te ringatohu, o Kereama Wright, ka puta tēnei hei kai mā te ao whānui.
“Ko te manako ia, ka kite te motu, ehara te reo Māori, te kura Māori, otirā, te tuakiri Māori i te taupā, kia ekea ai ngā tihi teitei o te maunga, ahakoa te mahi.”
“Hei tauira tēnei ki ngā iwi taketake o te ao. Arā, kia ū tātou ki tō tātou ahurea, ki tō tātou motuhaketanga, ahakoa haere ai tātou ki hea.”
E whakaahuatia ana te terenga tuarua o Ruamata: It’s More Than Hockey i tēnei wā. Ka whakamānutia ki runga o RNZ hei te tau e tū mai nei.
FULL DOCUMENTARY:
Related articles:
Whakamōhiotia mai ō whakaaro! Ahakoa pai, kaore rānei. Share your thoughts - good or bad! - Kereama Wright
Ka rawe!